HönnunarMars 2012 – 22.-25. mars

Að þessu sinni stendur Arkitektafélag Íslands fyrir viðburðum í Ráðhúsi Reykjavíkur.
Þemað er líkön og arkitektar framtíðarinnar.

Dagskráin er þríþætt.

Arkitektúr í líkönum:
Sýning á líkönum af garðskála í Hljómskálagarðinum.  Nemendur á 2. ári í arkitektúr við Listaháskóla Íslands fengu nýverið það verkefni að móta viðburða- og afþreyingarskála í Hljómskálagarðinum í Reykjavík.  Staðsetning innan garðsins var frjáls.  Nemendur könnuðu hina efnislegu úrlausn hugmyndar í heildsteypta byggingu með það að markmiði að byggingatækni, efniskennd og deililausnir styddu inntak hugmyndar. Vistvæn sjónarmið skyldu höfð til hliðsjónar í  allri hugmyndavinnu og úrvinnslu.  Verkefninu var stýrt af Sólveigu Berg  og Ásdísi Helgu Ágústdóttur hjá YRKI arkitektum, auk þess sem Björn Guðbrandsson á ARKÍS kom með innlegg í umræðuna um vistvæna nálgun.

Fyrirmyndarborgin:
Borg rís í sölum Ráðhússins. Fjölskyldur og börn geta fengið úthlutaðri lóð í skipulagi sem verður komið fyrir á gólfi Ráðhússins, þar byggja þau hús, torg og garða. Þeir sem ekki  taka þátt geta fylgst með af svölum Ráðhússins. Allt efni er endurunnið afgangsefni.  Á opnunarkvöldinu þann 22. mars verður skorað á arkitekta að hefja leikinn.

Fyrirlestrarnir:
Nokkrir áhugaverðir fyrirlestrar verða í boði á sunnudeginum.  Þar munu arkitektar fjalla um hefðbundna og óhefðbundna nálgun á fagið og aðferðafræði sem er oft á tíðum á undanhaldi.  Fyrirlestrarnir verða sunnudaginn 25. mars.  Nánari upplýsingar um fyrirlestra birtast fljótlega.

Auk þess mun ritnefnd AÍ bjóða gestum að glugga í blöð og bækur félagsins.

Allt hefst þetta með góðum stuðningi.

STYRKTARLÍNUR og LOGO – Við óskum eftir stuðningi í gengum styrkarlínur sem birtast munu í dagskrá og á heima- og Facebook síðu AÍ.  Línan kostar kr. 5.000, kr. 10.000 eða kr. 15.000. 

Logo í dagskrá kostar kr. 25.000.

SJÁLFBOÐALIÐAR – Við uppsetningu sýningar og við yfirsetu á sýningardögum.  Margar hendur vinna létt verk eins og máltækið segir.

                                                      Hafið samband á netfangið dagskrarnefnd@ai.is

Með góðri kveðju og jákvæðni,
Auður, Gunnar, Hildur og Una, meðlimir í dagskrárnefnd AÍ