Námskeiðin eru ætluð öllum aðilum í byggingargeiranum, iðnaðarmönnum jafnt sem arkitektum og öðrum umhverfishönnuðum. Þau samanstanda af fyrirlestrum og verkefnum sem gefa innsýn í viðkomandi málaflokk og þjálfa þátttakendur í upplýsingaöflun og mati á umhverfisgæðum.

Námskeiðin verða haldin í húsnæði Iðunnar, fræðsluseturs, Skúlatúni 2 í Reykjavík og fer skráning fram á heimasíðu Iðunnar   http://www.idan.is/bygginga-og-mannvirkjagreinar-namskeid. Verð á hvert námskeið er  20.000 kr. en 4.000 kr. til aðila Iðunnar og félaga í AÍ.

 

Vistvæn byggingarefni     8. og 10. maí      kl. 16-20

Kennarar: Aðalsteinn Snorrason og Björn Guðbrandsson, arkitektar

Á námskeiðinu verður farið í gegnum hugmyndafræði sjálfbærnihugtaksins,  mikilvægi aukinnar umhverfisvitundar og grundvallaratriði vistvænnar hönnunar við val á vistvænum byggingarefnum. Áhersla er lögð á kynningu helstu hugtaka og greiningartækja fyrir vistvæn byggingarefni og áskoranir og ágreiningsmál rædd. Markmiðið með námskeiðinu er að hvetja þá sem að byggingariðnaði koma til þess að kynna sér þann ávinning sem felst í vistvænum áherslum og veita þeim sterkari grunn til þess að meta gæði byggingarefna. Þannig verða þátttakendur betur í stakk búnir til að vera virkir þátttakendur í vaxandi umræðu um síauknar kröfum um vistvæn byggingarefni, val á þeim og meðhöndlun. Í námskeiðinu verður megináhersla lögð á eflingu umhverfisvitundar og gagnrýna hugsun því málaflokkurinn er margslunginn, rannsóknir af skornum skammti, spurningarnar margar og enn sem komið er, fátt um svör.

Lykilorð: sjálfbærni, manngert umhverfi, vottunarkerfi, viðmið, kerfishugsun, ferlar, vistferilsgreiningar, umhverfisvitund, vistvæn viðhorf, áskoranir, ágreiningsmál, gagnaöflun, vinnuaðferðir, úrgangur, förgun, skaðleg efni, rokgjörn efni.

 

Skipulag, hönnun og veðrátta     15. og 16. maí      kl. 16-20                                            

Kennarar: Sigurður Harðarson, arkitekt og Magnús Jónsson, veðurfræðingur.

Á námskeiðinu verður fjallað um skipulag þéttbýlis og hönnun mannvirkja í íslenskri veðráttu. Raktir verða helstu þættir í veðurfari Íslands með áherslu á sérstöðu þess. Farið verður yfir samspil veðurs, landslags og mannvirkja og hvað þarf einkum að hafa í huga þegar byggt er og skipulagt í samræmi við veðuraðstæður. Megináherslan verður lögð á vindafar og nýtingu sólgeislunar hér á landi og hvernig má bæta lífsskilyrði fólks og vaxtarskilyrði gróðurs  með því að samþætta byggð, skjól og varma sólar. Loks verður fjallað um slagvirði og skafhríð og varnir gegn þeim svo og áhrif veðurs á viðhaldsþörf bygginga o.fl. Gerðar verða tilraunir með vindhermi og þrívíðum líkönum og farið í vettvangsferðir.

Lykilorð: veður, veðurfar, veðrátta, veðurmynd, veðurupplýsingar,  loftslag, vindur, vindafar, vindmælingar, vindstýring,  vindrós, vindhermir, vindkæling, skjól, skjólmyndun,  snjósöfnun, skafrenningur, sérstaða, byggingar, háhýsi, geislun, úrkoma, hiti, umhleypingar, gagnvirkni, samspil, loftþrýstingur, sólfarsvindar, hitafar, hitahvörf, sólskin, sólarhæð, skuggavarp, slagviðri, raki, skipulag, hönnun, byggðarmynstur, húsagerð, loftstraumar

 

Dagsbirta og vistvæn lýsing     21. og 22. maí      kl. 16-20                                           

Kennarar: Þórdís Rós Harðardóttir, lýsingarhönnuður og Anna Sigríður Jóhannsdóttir, arkitekt

Á námskeiðinu verður fjallað um mikilvægi dagsbirtu í byggingum og vistvæna lýsingarhönnun. Farið verður yfir þróun byggingarlistar með tilliti til notkunar dagsbirtu og tækniframfara í lýsingu, áhrif birtuumhverfis á heilsu og vellíðan og fjallað um markvissar leiðir til þess að auka upplifun og gæði birtuumhverfis í byggingum og ytra umhverfi.  Skoðaðir verða nýir staðlar og umhverfisvottanir og fjallað um sérstakar mælistikur fyrir mat á gæðum birtuumhverfis m.a. dagsbirtustuðul (daylight factor). Sérstök áhersla verður lögð á staðbundnar aðstæður hérlendis t.d. afstöðu til sólar, skuggavarp, ljósmengun o.fl. Að námskeiði loknu mun þátttakandi hafa öðlast aukinn skilning á túlkun sjálfbærni við hönnun mannvirkja sem varðar birtuumhverfi. Þannig verður þátttakandi tilbúinn að meta áhrif dagsljóss sem og rafmagnsljóss hvað varðar rekstur bygginga, umhverfisáhrif, vinnuvernd, upplifun og vellíðan.

Lykilorð: markviss nýting dagsljóss, gæði birtuumhverfis, þróun rafmagnslýsingar, alþjóðlegar vottanir bygginga og orkusparnaður rafmagnslýsingar, förgun rafljósabúnaðar, dagsljós og íslensk byggingarlist, vistvæn lýsing, lífsgæði og vellíðan, ljós og upplifun, samspil birtu og forms, umhverfisvitund, nýting innlendra auðlinda, vistvæn nýsköpun, íslensk byggingararfleifð.