Þann 19. oktober s.l. var skýrsla um aðkomu hins opinbera að skapandi greinum á Íslandi, Skapandi greinar – sýn til framtíðar, kynnt í Hörpu.

Skýrslan er unnin af starfshópi á vegum fjögurra ráðuneyta auk Íslandsstofu og Samtaka skapandi greina. Ráðuneytin sem að skýrslunni standa eru mennta- og menningarmálaráðuneyti, atvinnuvega- og nýsköpunarráðuneyti, fjármála- og efnahagsráðuneyti og utanríkisráðuneytis. Í henni er fjallað um hvernig  ríki og sveitarfélög, haga stuðningi sínum við skapandi greinar með lagasetningu, stjórnsýslu, fjárveitingum og fjárfestingu í menntun, rannsóknum og innviðum.

Á grundvelli skýrslunnar leggur starfshópurinn fram 19 tillögur sem miða að því að bæta starfsumhverfi hinna skapandi greina. Lögð er áhersla á að skapandi greinar séu atvinnugrein sem snerti mörg svið atvinnulífs, menningarlífs og mannlífs og að mikilvægt sé að tryggja þverfaglegt samstarf stjórnsýslu, atvinnulífs og menningarlífs til þess að stuðla að uppbyggingu greinarinnar.

Skýrsluna og mjög skýrar og greinagóðar glærur, sem notaðar voru í kynningu formanns nefndarinnar má hlaða niður á PDF formati á heimasíðu Hönnunarmiðstöðvar.