Ársskýrsla Húsafriðunarnefndar 2011 er komin út. Í ávarpi sem fylgir skýrslunni segir forstöðumaður Húsafriðunarnefndar Nikulás Úlfar Másson m.a. þetta: „Það sem hæst bar í annars mikilli umræðu um húsvernd á árinu var tillaga Húsafriðunarnefndar um friðun bygginga og nærumhverfis í Skálholti. Í september barst Húsafriðunarnefnd til eyrna að hafin væri vinna í Skálholti við að reisa torfhús, svonefnda Þorláksbúð, við hlið Skálholtskirkju. Af þessu hafði nefndin nokkrar áhyggjur þar sem, eins og fram kemur í bréfi nefndarinnar til biskups Íslands: „Í Skálholti eru m.a. tvær af vönduðustu byggingum 20. aldar á Íslandi og hafa því mikið gildi í byggingarlistasögu þjóðarinnar” og „Vegna þessa hárfína jafnvægis sem skapað hefur verið í Skálholti og myndar eitt fegursta manngerða umhverfi nútíma byggingarlistar í landinu ber að fara mjög varlega í allar breytingar og íhuga gaumgæfilega hvaða áhrif þær hafa á grenndina.”  Síðan var óskað eftir öllum gögnum sem fyrir kunnu að liggja til umsagnar. Í þeim gögnum sem bárust kemur fram að öllum undirbúningi hafði verið mjög áfátt. Hvorki hafði verið fengið leyfi sveitarstjórnar né stjórn Skálholtskirkjugarðs fyrir framkvæmdunum auk þess sem álitamál var um það hvort í gildi væri deiliskipulag og hvort samþykki þyrfti frá erfingjum höfundar Skálholtskirkju. Engin gögn bárust sem gáfu til kynna að farið hefði fram rannsókn á gerð eða stærð þess húss sem til stóð að endurbyggja, en sagt frá því að endurbyggingin byggðist á mælingum á skálanum að Keldum á Rangárvöllum.“

Ávarpið og ársskýrslan.