Skúlagata_21

(1. desember 2014 – FRÁ STJÓRN)

Stjórn AÍ bað Árna Jón Sigfússon, arkitekt á byggingarsviði Mannvirkjastofnunar að svara nokkrum spurningum sem hugsanlega komust ekki til skila á síðasta fundi:

Í kjölfar hádegisverðarfundar AÍ þann 17. nóvember s.l. þar sem ég kynnti stuttlega hlutverk Mannvirkjastofnunar við innleiðingu gæðastjórnunarkerfa í byggingariðnaði sendi ég ykkur neðangreint nokkra punkta:

Almennt um innleiðingu gæðastjórnunarkerfa í byggingariðnaði:

Mannvirkjastofnun vekur athygli á að allir sem skrá sig á byggingarleyfisskyld verk sem hönnuðir, hönnunarstjórar, iðnmeistarar eða byggingarstjórar eftir 1. janúar 2015 skulu vera með gæðastjórnunarkerfi sem samþykkt er af stofnuninni. Krafa um gæðastjórnunarkerfi byggir á  ákvæðum 24. gr., 31. gr. og 32. gr. laga um mannvirki en samkvæmt 7. tölulið ákvæða til bráðabirgða í lögunum er veittur frestur til 1. janúar 2015 til að uppfylla ákvæðin. Nánari upplýsingar má m.a. nálgast á vef Mannvirkjastofnunar undir neðangreindri slóð: http://www.mannvirkjastofnun.is/byggingar/gaedastjornunarkerfi/

Helstu spurningar sem bornar voru upp á fundinum og svör við þeim:

Verða allir hönnuðir sem ekki eru með skráð gæðastjórnunarkerfi réttindalausir um áramót?

Nei, gildistaka ákvæðisins á aðeins við um nýskráningar á byggingarleyfisskyld verk hjá embættum byggingarfulltrúa eftir 1. jan 2015.

 

Hvernig er umsóknarferlið um skráningu gæðastjórnunarkerfa?

Upplýsingar um umsóknarferli má sjá á umsóknareyðublöðum um skráningu gæðastjórnunarkerfa á vef Mannvirkjastofnunar.

 

Hver er munurinn á vottuðum gæðastjórnunarkerfum og þeim sem ekki eru með vottun?

Gæðastjórnunarkerfi sem eru með vottun (t.d. ISO vottun) eru skráð á grundvelli staðfestingar þar um. Önnur gæðastjórnunarkerfi þarf að fá skoðuð hjá faggiltri skoðunarstofu áður en Mannvirkjastofnun samþykkir þau og skráir í gagnasafn sitt.

 

Geta fleiri en einn starfsmaður fyrirtækis verið aðili að sama gæðastjórnunarkerfi?

Já, tilgreina þarf á umsókn um skráningu gæðastjórnunarkerfis fyrirtækis alla aðila sem nota kerfið og hlutverk þeirra sem hönnuða, hönnunarstjóra, byggingarstjóra eða iðnmeistara.

Gera þarf sérstaka grein fyrir eldri réttindum þeirra sem ekki eru á listum yfir löggildingar.

 

Þarf sérstakt gæðastjórnunarkerfi fyrir hverja starfsstétt?

Eitt gæðastjórnunarkerfi getur uppfyllt kröfur  fyrir alla aðila s.s. hönnuði, hönnunarstjóra, byggingarstjóra og iðnmeistara.

 

Hvaða skoðunarstofur hafa faggildingu til að skoða gæðastjórnunarkerfi?

Faggiltar skoðunarstofur sem skoða gæðastjórnunarkerfi í umboði Mannvirkjastofnunar eru þrjár, BSI, Frumherji og Rafskoðun, nánari upplýsingar um þær er að finna á vef Mannvirkjastofnunar.

  

Með góðri kveðju,

 

Árni Jón Sigfússon arkitekt á byggingarsviði Mannvirkjastofnunar