Lög Arkitektafélags Íslands

HEITI, AÐSETUR OG MARKMIÐ

1. gr.

Félagið heitir Arkitektafélag Íslands, skammstafað A.Í.  Aðsetur félagsins er í Reykjavík.

2. gr.

Tilgangur félagsins er að stuðla að góðri byggingarlist, efla samvinnu félagsmanna og standa vörð um hagsmuni þeirra.

FÉLAGAR, SKYLDUR OG RÉTTINDI

3. gr.

Fullgildir félagsmenn, íslenskir eða erlendir, geta þeir orðið sem hafa lokapróf í byggingarlist frá háskóla eða tækniháskóla, sem félagið viðurkennir.

Aukaaðild að félaginu geta þeir fengið sem eru í námi í byggingarlist.

Sá sem ganga vill í félagið, sendir skriflega beiðni um það til  stjórnar félagsins.  Þegar við á, skal inntökubeiðni fylgja leyfi ráðherra til starfsheitis, arkitekt (húsameistari), sbr. 3. gr. laga um rétt til starfsheitis nr. 62/1986.¹⁾ Inntökubeiðni skal borin upp til samþykktar á næsta stjórnarfundi.  Nái inntökubeiðnin samþykki, er umsækjandi upp frá því fullgildur félagsmaður.

Fullgildir félagsmenn noti löggilt starfsheiti, arkitekt (húsameistari) auk skammstöfunarinnar F.A.Í.

1) Nú:   Lög um löggildingu nokkurra starfsheita sérfræðinga í tækni- og hönnunargreinum

nr. 8/1996, með áorðnum breytingum, síðast breytt 17.02.2000.

4. gr.

Félagsmenn greiða félagsgjöld og útgáfugjöld eins og þau eru ákveðin á aðalfundi ár hvert. Eftirtaldir félagar greiða útgáfugjald:

-                  Nýútskrifaðir félagar í tvö ár eftir lokapróf.
-                  Nemendur í arkitektúr
-                  Félagar 67 ára og eldri, er hafa verið a.m.k. 10 ár í félaginu

Stjórn félagsins er heimilt að lækka félagsgjöld fullgilds félagsmanns af tímabundnum ástæðum, fari hann skriflega fram á það við stjórn.

5. gr.

Heimilt er að kjósa heiðursfélaga hvern þann er stuðlað hefur að framgangi og

þekkingu á byggingarlist, eða unnið ötullega fyrir félagið. Stjórn leggur tillögu um kosningu heiðursfélaga fyrir aðalfund.

6. gr.

Félagsmenn eru skyldir til að hlíta lögum þessum og reglum félagsins eins og þau eru nú eða síðar verða með löglegum breytingum.

AÐALFUNDUR, AUKAAÐALFUNDUR OG FÉLAGSFUNDIR

7. gr.

Aðalfund skal halda fyrir lok nóvembermánaðar ár hvert.  Fjórum vikum fyrir aðalfund lýsir félagsstjórn skriflega meðal félagsmanna eftir framboði til þeirra trúnaðarstarfa sem kjósa skal um á fundinum.  Til aðalfundar skal síðan boða skriflega með 14 daga fyrirvara. Með fundarboði skal fylgja, ef fram hafa komið, framboð til kosninga og tillögur um lagabreytingar. Aðalfundur er löglegur, ef löglega er til hans boðað.

8. gr.

Aðalfundur hefur æðsta vald í öllum málefnum félagsins.  Aðalfundi stýrir kjörinn fundarstjóri.  Hann athugar í fundarbyrjun, hvort löglega hafi verið til fundarins boðað og lýsir því síðan yfir hvort svo sé.  Einnig skal kosinn ritari fundarins.

Á aðalfundi skulu tekin fyrir þessi mál:

1.            Skýrslur stjórnar og nefnda.

2.            Endurskoðaðir reikningar félagsins.

3.            Ávöxtun sjóða.

4.            Lagabreytingar.

5.            Kosningar:

a)         Kosning stjórnar, sbr. 12. gr.

b)         Kosning tveggja endurskoðenda og eins til vara.

c)         Kosning í nefndir, sbr. 15.gr.  Kosið skal sérstaklega um formenn þeirra.

d)         Kosning fulltrúa í stjórn Minningarsjóðs Guðjóns Samúelssonar.

e)         Kosning annarra fulltrúa í samtök og ráð sem félagið  er aðili að.

6.           Árgjald og rekstraráætlun sbr. 18. gr.

7.           Önnur mál, er upp kunna að vera borin.

Atkvæðisrétt hafa allir viðstaddir fullgildir félagsmenn, sbr. þó 23. gr.

Fundargerð aðalfundar, undirrituð af fundarstjóra og ritara, skal liggja fyrir innan tveggja vikna frá aðalfundi og skal hún borin undir fyrsta almenna félagsfund þar á eftir.

9. gr.

Lögum félagsins má ekki breyta nema á aðalfundi enda séu 2/3 fundarmanna a.m.k. samþykkir breytingunni.

10. gr.

Aukaaðalfund skal kalla saman þegar þörf krefur að mati stjórnar eða þegar meirihluti félagsmanna krefst þess, og skal boða til hans á sama hátt og til venjulegs aðalfundar. Valdsvið aukaaðalfundar skal vera hið sama og aðalfundar.

11. gr.

Félagsfundi skal halda þegar stjórn félagsins telur við þurfa, eða þegar minnst 1/6 félagsmanna krefst þess skriflega og geta tilefnis.  Þegar lögmæt krafa um fund berst stjórn skal halda hann eigi síðar en innan 14 daga.

Formaður eða einhver úr stjórninni stýrir félagsfundum.  Til félagsfunda skal boða skriflega með 7 daga fyrirvara.  Ávallt skal getið fundarefnis í fundarboði og má aðeins gera samþykktir í nafni félagsins um mál, sem boðuð hafa verið.  Í gerðabók félagsins skal rita stutta skýrslu um það, sem gerist á félagsfundi.  Fundargerðirnar skulu lesnar upp á næsta fundi og bornar undir atkvæði.  Fundarstjóri og ritari undirrita síðan fundargerðirnar.

STJÓRN, FASTANEFNDIR, STOFNANIR, DEILDIR OG AÐILD FÉLAGSINS AÐ ÖÐRUM SAMTÖKUM

12. gr.

Stjórn félagsins skipa þrír menn,  formaður, gjaldkeri sem jafnframt er staðgengill formanns og ritari.  Formenn samkeppnisnefndar og markaðsnefndar eru varamenn í stjórn.

13. gr.

Stjórn félagsins fer með æðsta vald félagsins milli aðalfunda, sinnir rekstri félagsins og gætir hagsmuna félagsheildarinnar.  Stjórn ber skylda til að taka á þeim deilumálum sem til hennar er skotið.  Stjórnin heldur sérstaka gerðabók um fundi sína.

14. gr.

Fulltrúaráð A.Í. er skipað stjórn félagsins ásamt formönnum fastanefnda sbr. 15. gr. Að auki getur stjórn heimilað tengdum sérhópum/félögum sbr. 16. gr. að senda áheyrnarfulltrúa  á fulltrúaráðsfundi, og hafi  þeir tillögurétt en ekki atkvæðisrétt.

15. gr.

Fastanefndir félagsins eru: laganefnd, menntamálanefnd, markaðsnefnd,samkeppnisnefnd, dagskrárnefnd, ritnefnd, siðanefnd, orðanefnd og skemmtinefnd. Nefndirnar skulu starfa samkvæmt starfsreglum sem stjórn AÍ ákveður í samráði við viðkomandi nefnd. Starfsreglur skulu staðfestar á aðalfundi félagsins.

Hætti nefndarmaður störfum á kjörtímabili er stjórn heimilt að tilnefna mann í hans stað að höfðu samráði við sitjandi nefndarmenn. Formaður fastanefndar skal vera úr hópi kjörinna nefndarmanna.

Innan vébanda félagsins starfar auk þess Minningarsjóður Guðjóns Samúelssonar eftir eigin skipulagsskrá.

16. gr.

Innan vébanda A.Í. er heimilt að stofna félög er starfa að launa- og kjaramálum.   Einnig er heimilt að stofna landshlutafélög til þess að efla félagsstarf arkitekta búsettra utan höfuðborgarsvæðisins.

Félögin starfa sjálfstætt sem deildir og setja sér starfsreglur, er hljóta staðfestingu aðalfundar A.Í.

17. gr.

Aðild félagsins að öðrum samtökum skal samþykkt á lögmætum félagsfundi.  Þá skal í fundarboði kynna þau samtök og tilgang með inngöngu A.Í. í samtökin.  Hafi slík aðild fjárhagslegar skuldbindingar í för með sér skal leita staðfestingar aðalfundar.

Félagsmenn í A.Í. verða sjálfkrafa félagsmenn í Myndstefi, Myndhöfundasjóði Íslands, en Myndstef gegnir því hlutverki að vernda höfundarrétt félagsmanna vegna birtingar á verkum þeirra til almennings og vegna annarrar hliðstæðrar notkunar.

FJÁRMÁL

18. gr.

Aðalfundur samþykkir rekstraráætlun næsta starfsárs hverju sinni og ákveður árgjald með tilliti til hennar.

Stjórn ákveður gjalddaga árgjalda og dráttarvexti.

19. gr.

Reikningsár félagsins miðast við 30. september ár hvert.

Fyrir 1. nóvember skal stjórn félagsins hafa lokið við samningu reikninga fyrir liðið reikningsár og sent endurskoðendum.  Félagsmenn hafa aðgang að reikningum félagsins viku fyrir aðalfund.

20. gr.

Kjörnir endurskoðendur yfirfara reikninga félagsins fyrir reikningsárið og skila athugasemdum sínum til stjórnar a.m.k. viku fyrir aðalfund.

SIÐAREGLUR

21. gr.

Verði félagsmaður sakaður um brot á siðareglum félagsins, skal  sakargiftum vísað til umfjöllunar siðanefndar.

Að fenginni niðurstöðu siðanefndar skal nefndin senda stjórn niðurstöðu sína um sök eða sakleysi. Ef um sök er að ræða skal siðanefnd tiltaka hvort brot telst ámælisvert, alvarlegt eða mjög alvarlegt. Teljist brot ámælisvert skal stjórn veita viðkomandi arkitekt áminningu. Teljist brot alvarlegt skal stjórn veita viðkomandi arkitekt alvarlega áminningu og víkja honum frá trúnaðarstörfum fyrir félagið um ákveðinn tíma eða afþakka trúnaðarstörf hans fyrir félagið um ákveðinn tíma gegni hann ekki trúnaðarstörfum þegar  niðurstaða er upp kveðin. Ef brot er mjög alvarlegt er viðkomandi gerður rækur úr félaginu. Í því tilviki skal  stjórn leita staðfestingar aðalfundar á ákvörðuninni. Felli aðalfundur þann úrskurð að arkitekt skuli ekki gerður brottrækur úr félaginu, skal stjórn veita arkitekt alvarlega áminningu og afþakka trúnaðarstörf hans á sama máta og ef brot telst alvarlegt.

Endurnýjun félagsaðildar arkitekts sem hefur verið gerður brottrækur úr félaginu skal hljóta samþykki aðalfundar.

Siðanefnd getur þegar um alvarlegt eða mjög alvarlegt brot er að ræða mælt með að hinn brotlegi greiði kostnað vegna málsins.

Birta skal allar niðurstöður siðanefndar í málgagni AÍ.

ÚRSÖGN

22. gr.

Nú vill félagsmaður ganga úr félaginu, og er honum það heimilt, enda hafi hann sent stjórn skriflega úrsögn og sé skuldlaus við félagssjóð.

23. gr.

Skuldi félagsmaður eitt árgjald glatar hann atkvæðisrétti og nýtur þá ekki lengur þjónustu félagsins.  Skuldi félagsmaður tvö árgjöld skoðast það sem úrsögn úr félaginu, enda hafi stjórn tilkynnt félaganum stöðu hans áður í ábyrgðarbréfi.  Úrsögn með þessum hætti leysir menn ekki undan skuldum við félagssjóð.

FÉLAGSSLIT

24. gr.

Nú þykir ráðlegt eða nauðsynlegt að leysa upp félagið, og fer þá um tillögur þar að lútandi, sem um lagabreytingar.  Fundur sá, er samþykkir á lögmætan hátt að slíta félaginu, kveður á um hvernig ráðstafa skuli eignum þess og um borgun skulda.

Fyrst gefin út og samþykkt 14. nóvember 1936

Síðast endurskoðuð og samþykkt  18. nóvember 2010.