Skipulagsdagurinn verður haldinn fimmtudaginn 20. september næstkomandi í Gamla bíói í Reykjavík.

Aðalræðumaður dagsins er Charles Campion, arkitekt og borgarhönnuður sem leiðir samráðsskipulagsteymi hjá ráðgjafarstofunni JTP í London. Charles mun fjalla um samráðsnálgun við skipulagsgerð þar sem jafnframt er lögð áhersla á staðarmótun og gæði byggðar, en hann hefur langa reynslu af slíku starfi og hefur nýlega gefið út bók um efnið, 2020 Vision Collaborative Planning and Placemaking.

Í kjölfar nýafstaðinna sveitarstjórnarkosninga verður rætt um viðfangsefni sveitarstjórna á sviði skipulagsmála í byrjun kjörtímabils, ekki síst tengt endurskoðun aðalskipulags. Einnig verða kynnt ný lög um skipulag haf- og strandsvæða og fyrirhuguð verkefni við gerð strandsvæðisskipulags á Austfjörðum og Vestfjörðum. Þá verður nýju landsskipulagsferli fylgt úr hlaði með erindum um þau þemu sem áformað er að marka stefnu um á þeim vettvangi, þ.e. um það hvernig flétta má loftslagsmál, landslag og lýðheilsu sem best inn í skipulagsgerð.

Framsögumenn koma víða að og verður dagskráin samsett af erindum og panelumræðum með þátttöku gesta í sal.

Allir sem starfa að skipulagsmálum eru hvattir til að mæta.

Skráning er á vef Skipulagsstofnunar: http://www.skipulag.is/skipulagsstofnun/vidburdir/skipulagsdagurinn-2018

Þátttökugjald er kr. 6.000., innifalið er hádegisverður og veitingar í kaffihléum.

Nánari dagskrá verður kynnt síðar.

Skipulagsstofnun í samráði við Samband íslenskra sveitarfélaga stendur fyrir Skipulagsdeginum.