Iwo Borkowicz er pólskur arkitekt og gestakennari í vöruhönnun við hönnunar- og arkitektúrdeild. Hann mun halda hádegisfyrirlestur í fyrirlestraröðinni Gestagangur þriðjudaginn 5. nóvember 2019 klukkan 12:15 í fyrirlestrarsal A, Þverholti 11.
Þekktustu verk Iwo spanna allt frá endurhönnun félagsíbúða í Kúbu, gerð skóla í flóttamannabúðum í Tansaníu og til skúlptúra í Póllandi sem byggðu á gögnum um loftlagshlýnun. Hann er einn stofnenda arkitektastofunnar JEJU.studio en meginmarkmið stofunnar er að miðla rýmisskilningi samtímans með formum sem eru á mörkum klassískrar fegurðar og hversdagslegs vandræðaleika.
Iwo hlaut verðlaun Fundació Mies van der Rohe árið 2016 sem ungur og upprennandi arkitekt ásamt EAAE verðlaunum frá European Architectural Medals Committee. Árið 2017 var Iwo valinn einn af 20 ungum hönnuðum heimsins sem koma til með að breyta framtíð hönnunar, hópurinn var tilnefndur af World Design Events.
Fyrirlesturinn fer fram á ensku.
Öll velkomin!
Heimasíða JEJU.studio: https://jeju.studio/about-us/
Gestagangur
Með Gestagangi  er ætlunin að veita áhugasömum innsýn í áhugaverð verkefni og rannsóknir í hönnun og arkitektúr. Fyrirlesararnir eiga það sameiginlegt að vera stundakennarar eða erlendir gestakennarar við Hönnunar- og arkitektúrdeild. Allir eiga þeir það sameiginlegt að hafa vakið athygli fyrir einstök verkefni á sviði hönnunar eða arkitektúrs og hafa látið til sín taka á alþjóðlegum vettvangi.