Innsetning og umræður.

Helgina 2. – 3. október

Í tilefni af alþjóðlegum byggingarlistardegi verður slegið upp dagskrá á Kjarvalsstöðum Listasafns Reykjavíkur sem helguð er Jóni Haraldssyni arkitekt. Jón er fæddur í október 1930 og hefði því orðið 80 ára á þessu ári. Honum auðnaðist ekki að ná háum aldri en náði engu að síður að marka sterk spor á vettvangi íslenskrar byggingarlistar og í raun íslenskrar menningar, þar sem hann beitti sér á breiðum vettvangi og tók virkan þátt í opinberum umræðum í ræðu og riti með listamönnum af ýmsu tagi.

Jón meitlaði orðræðu sína rétt eins og byggingarnar hrátt og umbúðalaust, og hafði sterkar skoðanir varðandi ímynd og menntun arkitekta, skipulag, fagurfræði og íslenskt samfélag sem oft voru settar fram með beinskeyttri kímnigáfu. Meðal helstu verka hans eru Stykkishólmskirkja, félagsheimili stúdenta við Hringbraut, heimavistarskóli í Krýsuvík auk heilsugæslustöðva víða um land og íbúðarhúsa fyrir nafnþekkta einstaklinga svo sem listamennina Dieter Roth og Balthazar, rithöfundana Sigurð A. Magnússon og Jökul Jakobsson auk Þórðar Gröndal og Knúts Bruun.

Haraldur Jónsson myndlistarmaður mun setja upp innsetningu í sal Kjarvalsstaða, þar sem meðal annars verður brugðið upp byggingarlist og iðnhönnun Jóns auk hljóðmyndar sem unnin er í samstarfi við Guðna Tómasson útvarpsmann. Þar verður einnig að finna lampa sem Eyjólfur Pálsson í EPAL hefur látið framleiða að nýju í takmörkuðu upplagi undir merkjum syrpu sem kallast Hönnun fyrri daga vakin til lífsins, en áður hafa þar litið dagsins ljós hönnunarhlutir eftir Dieter Roth og arkitektinn Manfreð Vilhjálmsson.

Innsetningin mun standa helgina 2.-3. október en á laugardeginum verður einnig viðburður sem hefst klukkan 15:00 þar sem Péturs H. . Ármannsson arkitekt flytur fyrirlestur um verk Jóns og nokkrir vina hans og samstarfsmanna munu halda stutt erindi um hann.

Í kjölfarið, eða föstudaginn 15.október verður Guðni Tómasson með útsendingu tileinkaða Jóni í föstudagsútgáfu menningarþáttarins Víðsjár.