Nýtt í Vefverslun AÍ

(22. apríl 2014)

Ritröð Vistmenntar og Arkitektafélags Íslands um vistvænar áherslur í byggðu umhverfi eru nú komnar út og hægt er að kaupa bækurnar hverja fyrir sig á 2500 krónur eða allar saman á 7000 krónur í Vefverslun AÍ

Á síðustu áratugum hefur almenn vitund á vistvænum valkostum aukist þó svo að hugtakið vistvænt byggt umhverfi sé mörgum enn framandi. Fram til þessa hefur lítið farið fyrir umræðu um hlutdeild byggingargeirans í ágangi á náttúruauðlindir og þar með versnandi lífsmöguleika komandi kynslóða. Þrátt fyrir að einungis um 7% fólks í heiminum starfi við byggingariðnað og hlutur hans í vergri landsframleiðslu sé ekki nema um 10% má rekja um helming nýtingar náttúruauðlinda og allt að 40% orkunotkunar og útblásturs gróðurhúsalofttegunda til byggingariðnaðar. Sem framlag til umræðunnar eru nú gefin út fræðslurit um sjálfbærni í byggðu umhverfi með hliðsjón af íslenskri sérstöðu sem felst einkum í norðlægri hnattstöðu, landlegu, landslagi, veðurfari, einstakri náttúru og aðgangi að orku og hreinu vatni; eiginleikum sem hægt era ð nýta betur til að skapa vistvænna búsetuumhverfi.

Dagsbirta sem vistvænn birtugjafi

Í þessu riti er dagsbirta skoðuð út frá vistvænum eiginleikum hennar og síbreytilegum árstíðabundnum áhrifum á norðlægum slóðum þar sem sumur eru björt og vetur dimmir. Meðhöndlun dagsbirtu í byggingarlist og borgarskipulagi á Íslandi er skoðuð í sögulegu samhengi og fjallað um hugmyndafræðilegar áherslur. Með vistvænni hönnun birtuumhverfis er mögulegt að auka gæði umhverfis og bygginga, bæta heilsu og vellíðan, draga úr orkunotkun og rekstrarkostnaði, framleiðslu og flutningum og minnka þar með ágang á náttúruauðlindir.

Höfundur: Anna Sigríður Jóhannesdóttir, arkitekt FAÍ

Ritröð: Hönnun og skipulag vistvænni byggðar á Íslandi

Útlitshönnun og umbrot: Anton Kaldal Ágústsson

Verkefnis- og ritstjóri: Kristín Þorleifsdóttir, Ph.D. umhverfishönnun, landslagsarkitekt FÍLA

Val á vistvænni byggingarefnum

Höfundar: Björn Guðbrandsson, arkitekt FAÍ, Aðalsteinn Snorrason, arkitekt FAÍ og Egill Guðmundsson, arkitekt FAÍ.

Ritröð: Hönnun og skipulag vistvænni byggðar á Íslandi

Útlitshönnun og umbrot: Anton Kaldal Ágústsson

Verkefnis- og ritstjóri: Kristín Þorleifsdóttir, Ph.D. umhverfishönnun, landslagsarkitekt FÍLA

Í þessu riti er fjallað um hugmyndafræði sjálfbærnihugtaksins. mikilvægi aukinnar umhverfisvitundar og grundvallaratriði vistvænni hönnunar við val á byggingarefnum. Áhersla er lögð á kynningu helstu hugtaka og greiningartækja og fjallað um helstu áskoranir og ágreiningsmál. Markmiðið með ritinu er að hvetja þá sem að byggingariðnaði koma til þess að kynna sér auknar kröfur um byggingarefni og þann ávinning sem felst í vistvænum áherslum og veita þeim þannig sterkari grunn til þess að meta gæði byggingarefna.

Höfundar: Magnús Jónsson, veðurfræðingur og Sigurður Harðarson, arkitekt FAÍ

Ritröð: Hönnun og skipulag vistvænni byggðar á Íslandi

Útlitshönnun og umbrot: Anton Kaldal Ágústsson

Verkefnis- og ritstjóri: Kristín Þorleifsdóttir, Ph.D. umhverfishönnun, landslagsarkitekt FÍLA

Íslendingar búa við veðuraðstæður sem óvíða verður við jafnað; aðstæður sem gera gríðarlegar kröfur til tæknilegs frágangs mannnvirkja en hafa líka mikil áhrif á mannlíf utandyra. Í þessu riti er fjallað um samspil veðurfars, vinda, úrkomu og sólfars og áhrif þessara þátta á byggingar os skipulag byggðar. Með góðri þekkingu á veðurfarslegum aðstæðum má beita margs konar mótvægisaðgerðum sem mildað geta neikvæð áhrif veðurfars á umhverfið og gera lífið bæði öruggara og notalegra. Vistvænna umhverfi á Íslandi byggir að stóru leyti á tilliti til staðbundinna aðstæðna og er mikilvægt að góð þekking sé ávallt lögð til grundallar ákvörðunum.

Nýtt í Vefverslun AÍ

NÝJUSTU FÆRSLUR