Í gegnum Opna listaháskólann getur fólk sótt námskeið sem kennd eru öllum í deildum Listaháskóla Íslands. Hægt er að taka opin námskeið með eða án ECTS háskólaeininga. Nokkuð algengt er að nemendur taki námskeið í Opna listaháskólanum með það fyrir augum að safna einingum í meistaranámi. Námskeið í Opna LHÍ eru ætluð listamönnum, starfandi kennurum og leiðbeinendum og öllu öðru áhugasömu fólki. 

Í fjölbreyttri námskeiðsflórunni er meðal annars hægt að læra um sýningagerð- og sýningastjórnun, kynna sér listmeðferð í námi, tengsl tónlistar og heilabilunar, fræðast um íslenska leiklistarsögu og einnig rannsaka möguleika í notkun einfaldra kóða og aðgengilegrar rafeindatækni í listsköpun og hönnun, svo fátt eitt sé nefnt en alls eru 28 námskeið í boði á vorönn ´19.

Hér er hægt að kynna sér nánar öll þau fjölmörgu námskeið sem deildirnar bjóða upp á á vorönn, skráning er þegar hafin. Einnig er hægt að fylgjast með fréttum um Opna LHÍ á Facebook.

Fimmtudaginn 10. janúar kl. 12.15 – 13 fer fram kynning á námskeiðsframboði vorannarinnar. Kynningin verður í húsnæði LHÍ Laugarnesvegi 91 og verða fulltrúar allra deilda á staðnum.