Viltu hanna og byggja hús án kostnaðarramma og byggingareglugerðar? Arkitektafélag Íslands stendur fyrir piparkökuhúsakeppni arkitekta nú í aðdraganda jóla. Þetta er kjörið tækifæri fyrir arkitekta og arkitektastofur landsins til að taka sér smá frí frá erli dagsins, eiga huggulegan dag saman og gefa sköpunarkraftinum lausan tauminn.

Afrakstur vinnunnar verður síðan til sýnis á Kjarvalsstöðum í einu viku en þá munum við stilla upp öllum þeim húsum sem taka þátt í piparkökuhúsakeppninni. Búast má við því að margir sæki sýninguna á aðventunni enda er ekki á hverjum degi sem arkitektar hanna og gera ætileg hús. Með þessu gefst almenningi tækifæri á því að kynna sér arkitektastofur landsins á skemmtilegan hátt. Sýningin á húsunum verður opnuð með pompi og pragt og myndum af húsunum verður dreift víða og fá eflaust mikið pláss á samfélagsmiðlum. Þetta verður því gott tækifæri fyrir arkitektastofurnar að kynna sig út á við en auðvitað er þetta fyrst og fremst til gamans gert.

Tímarammi:

  • 9. nóvember-keppnin kynnt til leiks
  • 3. desember-skilafrestur kl. 12.00. Húsum skilað á Kjarvalsstaði
  • 3.-9. desember-Húsun til sýnis á Kjarvalsstöðum í Reykjavík
  • 9. desember-Rýnifundur og verðlaunaafhending

Samkeppnislýsing:

Samkeppnin er opin öllum arkitektum í Arkitektafélagi Íslands. Einstaklingar sem og teymi og/eða stofur geta tekið þátt. Húsið sem byggt er þarf að vera höfundarverk þátttakenda. Það má vera frumhönnun fyrir keppnina og gert eftir teikningu eða húsi sem arkitektinn/stofna hefur þegar látið byggja. Húsið þarf þó fyrst og fremst að vera glæsilegt og gómsætt!

Skilagögn:

  • Piparkökuhús
  • Góð ljósmynd af húsinu
  • Teikningar

Skráið ykkur í keppnina með því að senda póst á gerdur@ai.is

#arkipiparkökur verður notað og hvetjum við arkitekta til þess að deila myndum á samfélagsmiðla og einnig til þess að fylgjast grannt með keppinautum.

Verðlaun og dómefnd verða kynnt síðar

Kær kveðja frá piparkökuhúsanefnd AÍ,

Hildur Gunnlaugsdóttir og Gerður Jónsdóttir