Til hvers að vera félagi í Arkitektafélagi Íslands?

2BHM

 

Kæru félagar,

Nú er tekin til starfa hjá félaginu starfshópur sem vinnur að kjaramálefnum. Það má segja að hann komi í stað launþeganefndar félagsins sem einu sinni var en hefur ekki starfað um nokkurra ára skeið. Tilkoma hópsins tengist svo auðvitað beint þeirri staðreynd að félagið gerðist fyrir rúmi ári síðan aðili að BHM og þeim fjölgar nú  hægt og bítandi sem kjósa að eiga stéttarfélagsaðild að AÍ með því að greiða félagsgjöld sín gegnum BHM. Starfshópurinn hefur í hyggja að heimsækja á næstunni vinnustaði arkitekta og kynna þeim kosti félagsaðildar og þá einkum mikilvægi þess öryggis sem í því felst að vera í stéttarfélagi. Ég vona að fulltrúum hópsins verði vel tekið og erindi þeirra eigi eftir að hreifa við þeim sem spyrja hvaða tilgangi það þjóni fyrir þá að vera félagi í AÍ, hvort heldur er fagfélags- eða stéttarfélagshluta þess.

Þeir sem kjósa að eiga stéttarfélagsaðild að Arkitektafélagi Íslands njóta allra þeirra augljósu kosta og öryggis sem því fylgir að vera í stéttarfélagi. Þeir gerast þá um leið aðilar að heildarsamtökum háskólamenntaðra á vinnumarkaði.  Grundvallarmarkmið BHM er að efla fagstéttarfélög háskólamanna, standa vörð um samningsrétt þeirra og auka veg æðri menntunar á Íslandi.  Starfsemi bandalagsins byggir þannig á tveimur meginþáttum: að menntun háskólamanna sé virt sem forsenda þróunar og framfara í íslensku atvinnulífi og að hún sé metin að verðleikum til launa.

Fyrir þá sem kjósa að vera fagaðilar og standa utan við stéttarfélagsaðildina að BHM eru kostirnir líka margir þó þeir séu kannski ekki jafn augljósir. Við þá og ykkur öll myndi ég vilja vitna í John Fizgerald Kennedy sem þótti einstaklega góður ræðumaður. Hann sagði einu sinni í ávarpi til landa sinna:”Spyrðu ekki hvað þjóð þín geti gert fyrir þig, spyrðu heldur hvað þú getir gert fyrir þjóð þína.” Aðild að félaginu fylgja ýmsir kostir, s.s. boð á ýmsa spennandi viðburði, afslættir á námskeiðsgjöldum o.fl. En fyrst og fremst skapar félagið þeim þó tækifæri til áhrifa á fagleg málefni og getur reynst þeim tæki til að koma jákvæðum hlutum í verk og stuðla að jákvæðum breytingum.

Það er mjög misjafnt hver kjör starfsstétta á Íslandi eru og hvaða virðingar og verndar starfsheiti njóta. Þær stéttir sem mestum árangri hafa náð eiga það gjarnan sameiginlegt að hafa á bakvið sig sterk fagfélög þar sem samtakamáttur félagsmanna er öflugur. Félög með skýr fagleg og félagsleg markmið, þar sem félagsmenn standa þétt saman um félagslög og siðareglur eru ein af mikilvægustu forsendum betri árangurs.

Frá upphafi hefur það verið hlutverk Arkitektafélags Íslands að veita stjórnvöldum umsögn um nám þeirra sem óska heimildar stjórnvalda til að bera hið lögverndaða starfsheiti arkitekt. Félagið veitir einnig umsagnir um lagafrumvörp sem varða störf stéttarinnar og oft tekst að koma góðum ábendingum á framfæri og koma í veg fyrir mistök. Félagið tilnefnir fulltrúa í nefndir, ráð og starfshópa sem oft hafa mikil áhrif á starfsumhverfi arkitekta og fyrir allt hið manngerða umhverfi í landinu. Félagið átti t.d. mikinn þátt í mótun Menningarstefnu í mannvirkjagerð – stefnu íslenskra stjórnvalda í byggingarlist sem staðfest var af menntamálaráðuneyti fyrir hönd stjórnvalda í apríl 2007 og hefur fylgt þeirri stefnu fast eftir æ síðan. Allt frá því að ný mannvirkjalög voru samþykkt á Alþingi í desember 2010 hefur félagið endurtekið bent á ýmsa vankanta á þeim og óskað eftir breytingum.   Róttækar breytingar sem gerðar voru nýverið á byggingareglugerð, urðu til þess, að þó enn sé langt í land með að viðunandi lausn fáist, hefur margt áunnist og skapaður hefur verið fastur grundvöllur samstarfs félagsins við stjórnvöld til áframhaldandi vinnu á þessu sviði.

Félagið hefur staðið fyrir margháttuðu fræðslu- og upplýsingarstarfi gegnum árin, bæði í eigin nafni og í vaxandi mæli í samstarfi við aðra.

Félagið er virkur aðili í Bandalagi íslenskra listamanna og er mjög virkt í starfi Hönnunarmiðstöðvar Íslands. Þar tekur það m.a. þátt í útgáfu tímaritsins, HA – Nýtt tímarit um hönnun og arkitektúr sem gefið er út af níu fagfélögum undir formerkjum Hönnunarmiðstöðvar Íslands, en því er ætlað að kynna og sýna fram á mikilvægi góðrar hönnunar.

Flest störf félagsins eru unnin af stjórn, nefndum, starfshópum og einstökum fulltrúum þess í óeigingjörnu sjálfboðaliðsstarfi í þágu félaga sinna. Auk þess rekur félagið skrifstofu til að styðja við starfið og veita margskonar þjónustu, svo sem vinnu við samkeppnishald félagsins, sem varla væri svipur hjá sjón ef félagsins nyti ekki við. Skrifstofan er fjármögnuð með félagsgjöldum og útseldri vinnu við samkeppnishald.

Mig langar svo í lokin, kæru félagar, til að segja ykkur frá og undirbúa ykkur undir að til stendur að ráðst í stefnumótunarvinnu í haust og í vetur. Stjórn AÍ hefur boðað til fulltúarráðsfundar á næstunni. Þar verður m.a. til umræðu undirbúningur að nýrri stefnumótun félagsins. Sex ár eru nú liðin síðan félagið fór síðast í stefnumótunarvinnu og nú í haust þykir tímabært að endurmeta þá vinnu og setja nýjan kúrs. Leitað verður til allra félaga um afstöðu þeirra og hugmyndir um hver sé staða félagsins, hvað sé í starfseminni gott og hvað slæmt, hvað sé mikilvægt og hvað skipti minna máli.

 

Með kærri kveðju,

Hallmar Sigurðsson, framkvæmdastjóri AÍ

hallmar@ai.is

 

Enn hefur enginn viðrað skoðun sína á þessu málefni, þú getur hafið umræðuna?

Deilið athugasemd

Arkitektafélag Íslands / Aðalstræti 2. 2.hæð / 101 Reykjavík  / +354 780 2228  / ai@ai.is / Pósthólf 590 – 121 Reykjavík
Skrifstofa Arkitektafélags Íslands er opin mánudaga til föstudaga milli kl. 9:00 og 13:00