samtalOKT2015

 

Arkitektafélag Íslands gerði á ýmsan hátt meira úr Alþjóðlegum degi arkitektúrs en gert hefur verið áður. 150 fjölmiðlamönnum voru send bréf með upplýsingum um daginn og þema þessa árs. UIA (Alþjóða samtök arkitekta) höfðu gefið út að þetta ár myndi dagurinn tengjast loftslagsráðstefnunni sem haldinn verður í París í desember og þemað því ARCHITECTURE, BUILDING, CLIMATE – COMMITMENTS AND SOLUTIONS. Íslenskir fjölmiðlamenn voru upplýstir um allt það helsta sem íslenskir arkitektar hafa gert á undanförnum árum til að bregðast við ákalli tímans um varanlegri vistvænni byggingar og skipulag og hvattir til að fjalla um þau brýnu málefni sem þar eru á ferðinni. Nokkrir brugðust strax vel við og vitað er að frekari umfjöllunar er að vænta á næstunni.

Í tilefni dagsins boðaði Arkitektafélagið til opins fundar, SAMTALS í Hannesarholti þar sem flutt voru nokkur stutt erindi um vistvæna hugsun í manngerðu umhverfi, stöðu og horfur. Frummælendur voru arkitektarnir  Sigrún Birgisdóttir, Anna María Bogadóttir, Gunnar Örn Sigurðsson og Borghildur Sturludóttir. Haldór Eiríksson var fundarstjóri og stýrði pallborðsumræðum og almennum umræðum. Mæting var mjög góð, rúmlega fimmtíu manns og góður andi ríkti á fundinum. Vissulega hefði þó verið ánægjulegt að sjá fleira fjölmiðlafólk því erindin og umræðan átti vissulega erindi út fyrir raðir arkitekta.